شیعہ نیوز: شیعہ علماء کونسل پاکستان کے سربراہ علامہ سید ساجد علی نقوی کہتے ہیں جنگیں کسی مسئلہ کا حل نہیں بلکہ خود ایک بڑا مسئلہ ہیں، مگر جب قوموں پر مسلط کی جائیں تو مادر وطن کا دفاع لازم ہوجاتا ہے۔ دفاع وطن کیلئے جانیں نچھاور کرنے والوں کی بلندی درجات کیلئے دعا کرتے ہوئے انہوں نے کہا کہ جارح کو بھرپور انداز میں جواب دے کر واضح کردیا گیا کہ پاکستان کا دفاع مضبوط اور ناقابل تسخیر ہے، اب پاکستان کو دفاع کے ساتھ معاشی طور پر بھی مضبوط بنانا ہوگا۔
علامہ سید ساجد علی نقوی نے کہا کہ چیلنجز کا مقابلہ قومی یکجہتی، جدید ترین علوم اور ٹیکنالوجی سے ہی ممکن ہے جبکہ خطے میں امن و استحکام بہترین سفارتکاری کے ذریعے ہی ممکن بنایا جاسکتا ہے۔ انہوں نے کہا کہ دھونس اور دھمکیوں سے مسائل حل ہونے کے بجائے مزید پیچیدہ ہوجاتے ہیں۔
ان خیالات کا اظہار علامہ سید ساجد علی نقوی نے آپریشن بنیان مرصوص کا ایک سال مکمل ہونے پر اپنے پیغام، خطے کی تازہ ترین صورتحال پر تبصرے اور مختلف شخصیات سے گفتگو کرتے ہوئے کیا۔
علامہ سید ساجد علی نقوی نے کہا کہ جنگیں خود مسائل پیدا کرتی ہیں، مگر جب جارحیت مسلط کی جائے تو مادر وطن کا دفاع لازم ہوجاتا ہے، جس کا مظاہرہ پاکستان نے گزشتہ مئی میں کئی گنا بڑے دشمن بھارت کو بھرپور انداز میں تاریخی جواب دے کر کیا اور واضح کردیا کہ پاکستان کا دفاع مضبوط اور ناقابل تسخیر ہے۔
انہوں نے کہا کہ دوسری جانب ایران نے بھی اپنے اوپر مسلط کردہ سامراجی و صہیونی جنگ و جارحیت کا جس طرح دلیرانہ مقابلہ کیا، وہ تاریخ میں ہمیشہ یاد رکھا جائے گا۔
یہ بھی پڑھیں : ظلم کے خلاف جدوجہد ہماری تاریخ کا روشن باب ہے، صدر پزشکیان
علامہ سید ساجد علی نقوی نے مزید کہا کہ اب پاکستان کو دفاعی لحاظ کے ساتھ ساتھ معاشی لحاظ سے بھی مضبوط بنانا لازم ہے۔ جب تک پاکستان آئی ایم ایف سمیت دیگر مالیاتی اداروں سے خود کو آزاد نہیں کرے گا اور ملکی معیشت کو دیمک کی طرح چاٹتی کرپشن کا خاتمہ نہیں ہوگا، اس وقت تک مضبوط مملکت کا خواب شرمندۂ تعبیر نہیں ہوسکتا۔
انہوں نے زور دیتے ہوئے کہا کہ چیلنجز کے مقابلے کیلئے قومی یکجہتی، جدید ترین علوم اور ٹیکنالوجی سے نئی نسل کو آراستہ کرنا ہوگا۔
خطے کی صورتحال پر تبصرہ کرتے ہوئے علامہ سید ساجد علی نقوی نے کہا کہ دنیا نہ صرف ایک تیسرے عالمی تنازعے کے اثرات کا سامنا کررہی ہے بلکہ صورتحال جوں کی توں رہی تو مزید مسائل پیدا ہوں گے۔ انہوں نے کہا کہ ان مسائل کا واضح حل سفارتکاری اور مذاکرات کے ذریعے ہی ممکن ہے، تاہم یہ مذاکرات دھونس اور دھمکیوں کے ماحول کے بجائے آزادانہ ماحول میں ہونے چاہئیں، بصورت دیگر مسائل حل ہونے کے بجائے مزید پیچیدہ اور صورتحال مزید کشیدہ ہوجائے گی۔
The post مادروطن کا دفاع زندہ قوموں کا فریضہ، آپریشن بنیان مرصوص دشمن کو تاریخی جواب ہے،علامہ ساجد نقوی appeared first on شیعہ نیوز پاکستان.
