شیعہ نیوز: پاکستان میں ایرانی سفیر نے شہید رہبر انقلاب اسلامی کی آخری رسومات میں شرکت پر پاکستان کا شکریہ ادا کیا ہے۔
اسلام آباد سے ذرائع ابلاغ کی رپورٹ کے مطابق پاکستان میں ایران کے سفیر رضا امیری مقدم نے شہید رہبر انقلاب اسلامی حضرت آیت اللہ العظمیٰ سید علی خامنہ ای کی آخری رسومات میں شرکت کرنے پر پاکستان سے اظہار تشکر کیا ہے۔
سوشل میڈیا فلیٹ فارم ایکس پر جاری بیان میں ایرانی سفیر نے کہا کہ ایرانی حکومت اور عوام کی جانب سے شہید رہبر کے جنازے میں پاکستان کی شرکت پر شکریہ ادا کرتا ہوں، وزیراعظم شہباز شریف، فیلڈ مارشل اور نائب وزیراعظم کا شکریہ ادا کرتا ہوں۔
یہ بھی پڑھیں : آبدوز سے اسٹریٹیجک میزائل چلانے کا چین کا کامیاب تجربہ
انہوں نے کہا کہ چیئرمین سینیٹ یوسف رضا گیلانی، اسپیکر ایاز صادق، وزیر داخلہ محسن نقوی، وزیراطلاعات عطا تارڑ، دیگر اعلیٰ حکام اور مذہبی شخصیات، سیاسی رہنماؤں اور ثقافتی شخصیات کی شرکت پر بھی شکر گزار ہوں۔
ایرانی سفیر کا کہنا تھا کہ پاکستان نے اس تاریخی اجتماع میں اعلیٰ ترین سطح پر شرکت کی، یہ شرکت دونوں برادر ممالک کے درمیان دیرینہ دوستی اور باہمی احترام کا مظہر ہے۔ یہ اقدام ایران اور پاکستان کے درمیان تاریخی تعلقات اور مشترکہ اقدار کی عکاسی کرتا ہے، ایران اور پاکستان نے تاریخ کے ہر غم اور خوشی کے موقع پر ایک دوسرے کا ساتھ دیا ہے۔
رضا امیری مقدم کا مزید کہنا تھا کہ اللہ تعالیٰ سے دعا ہے کہ ایران پاکستان دوستی اور برادرانہ تعلقات ہمیشہ قائم رہیں، اللہ تعالیٰ دونوں ممالک کو دائمی امن، خوش حالی اور وقار عطا فرمائے۔
The post شہید رہبر انقلاب کی آخری رسومات میں شرکت پر پاکستان کا شکریہ، ایرانی سفیر appeared first on شیعہ نیوز پاکستان.
