شیعہ نیوز: حکومت پنجاب نے پنجاب قرآن بورڈ کی ازسرِ نو تشکیل کرتے ہوئے مختلف مکاتبِ فکر سے تعلق رکھنے والے علما، ماہرین، رضاکار اراکین اور سرکاری افسران کو شامل کر لیا ہے۔ اس حوالے سے محکمہ اوقاف و مذہبی امور پنجاب کی جانب سے باقاعدہ نوٹیفکیشن جاری کر دیا گیا ہے۔ بورڈ میں شامل کیے گئے ممبران تمام فرقوں سے لیے گئے ہیں۔ نوٹیفکیشن کے مطابق وزیر اعلیٰ پنجاب کی منظوری سے تشکیل دیئے گئے پنجاب قرآن بورڈ کی مدت تین سال مقرر کی گئی ہے۔ بورڈ میں بریلوی، دیوبندی، اہلِ حدیث اور اہلِ تشیع مکاتبِ فکر کے نمائندہ علما کو شامل کیا گیا ہے تاکہ قرآن پاک کی اشاعت، طباعت اور ریکارڈنگ سے متعلق امور کو تمام مکاتبِ فکر کی مشاورت سے بہتر انداز میں انجام دیا جا سکے۔
بریلوی مکتبِ فکر سے ڈاکٹر محمد کریم خان، سعید احمد شاہ گجراتی، ڈاکٹر مفتی انتخاب احمد اور ڈاکٹر نبیرا عندلیب کو شامل کیا گیا ہے، جبکہ دیوبندی مکتبِ فکر سے علامہ زبیر حسن، قاری احمد میاں تھانوی، مولانا طاہر عقیل اعوان اور پروفیسر ڈاکٹر محسنہ منیر بورڈ کا حصہ ہوں گے۔ اسی طرح اہلِ حدیث مکتبِ فکر سے ڈاکٹر عبدالغفور راشد، ڈاکٹر علامہ سید ضیا اللہ شاہ بخاری، علامہ محمد شفیق پسروی اور مسز زاہدہ شبنم کو رکن نامزد کیا گیا ہے۔
یہ بھی پڑھیں : حلقہ 5نگرکی انتخابی سیاست میں ہلچل، ایم ڈبلیوایم اور پی ٹی آئی کے متفقہ امیدوار ریاض اکبر کی شاندار انٹری
اہلِ تشیع مکتبِ فکر سےادارہ منہاج الحسینؑ جوہر ٹاون کے بانی سربراہ علامہ ڈاکٹر محمد حسین اکبر، جامعہ المنتظر کے سینیئر مدرس اور وفاق المدارس الشیعہ پاکستان کے جنرل سیکرٹری علامہ محمد افضل حیدری، ممتاز شیعہ رہنما خواجہ بشارت حسین کربلائی اور ممتاز عالمہ مسز فروا بتول شامل ہیں۔ نوٹیفکیشن کے مطابق چند نمایاں شخصیات کو بطور رضاکار اراکین بھی بورڈ میں شامل کیا گیا ہے جن میں میاں محمد راشد، شیخ محمد ناظم الدین، قدرت اللہ اینڈ کمپنی کے نمائندے اور سید احسن محمود شامل ہیں۔ مزید برآں محکمہ داخلہ، محکمہ اطلاعات و ثقافت، محکمہ اسکول ایجوکیشن، پنجاب پولیس اور محکمہ اوقاف کے اعلیٰ افسران کو بھی بطور سرکاری اراکین بورڈ کا حصہ بنایا گیا ہے۔
The post پنجاب قرآن بورڈ کی تشکیل نو، علامہ محمد حسین اکبر اور علامہ افضل حیدری رکن منتخب appeared first on شیعہ نیوز پاکستان.
