شیعہ نیوز: وفاق المدارس الشیعہ پاکستان کے صدر آیت اللہ حافظ سید ریاض حسین نجفی نے کہا ہے کہ ربیع الاول خوشیوں کا مہینہ ہے۔ اس میں سب سے بڑی خوشی پیغمبر اکرم سردار الانبیاء حضرت محمد مصطفی صلی اللہ علیہ وآلہ وسلم کی ولادت باسعادت ہے۔ اسی مہینے میں امام مہدی علیہ السلام کی امامت کا آغاز بھی ہوا جبکہ آنحضرت صلی اللہ علیہ وآلہ وسلم اور جناب حضرت خدیجة الکبریٰ علیہا السلام کا نکاح بھی اسی ماہ ماہ ربیع الاول میں ہوا۔ امام جعفر صادق علیہ السلام کی ولادت باسعادت بھی اسی ماہ17 ربیع الاول کو ہوئی۔
جامع علی مسجد حوزہ علمیہ جامعة المنتظر میں خطاب کرتے ہوئے انہوں نے کہا کہ اللہ تعالیٰ نے انسان کی زندگی میں تنوع پیدا کیا ہے کیونکہ یہ تنوع انسان کو پسند ہے اور اگر یہ نہ ہوتا تو بنی اسرائیل من و سلو ی ٰپر راضی رہتے لیکن ایسا نہیں ہوا ۔انہوں نے کہا اس وقت ہر ملک میں کوئی نہ کوئی مسئلہ درپیش ہے۔ چھوٹے چھوٹے اختلافات پر مسلمان ایک دوسروں کی جان کے در پے ہو جاتے ہیں۔ دراصل یہ سب برداشت کی کمی ہے، حالانکہ دشمن ہمارے خلاف متحد ہیں اور ہم ایک خدا، ایک رسول، ایک قرآن اور ایک قبلہ کو ماننے والے متحد نہیں۔
حافظ ریاض نجفی نے کہا کہ سیرت النبی کا مطالعہ کریں تو پتہ چلتا ہے کہ میثاق مدینہ میں حضور نے مختلف مذاہب کو ایک جگہ اکٹھا کیا ،حتی ٰکہ ان کے درمیان مدینہ کے دفاع کا معاہدہ بھی ہوا۔ انہوں نے کہا پیغمبر اکرم صلی اللہ علیہ وآلہ وسلم دونوں جہانوں کے لیے رحمت اللعالمین بن کر آئے۔ وہ پوری کائنات کے لیے وہ رحمت بن کر آئے، آپ خلق عظیم کے مالک ہیں۔
یہ بھی پڑھیں : قائد ملت جعفریہ پاکستان علامہ مفتی جعفر حسینؒ کی 43ویں برسی آج منائی جا رہی ہے
حافظ ریاض نجفی نے کہا کہ قرآن کے مطابق اچھے لوگ لغویات سے دور رہتے ہیں۔ ہمارے حکمرانوں کی غلط بات یہ ہے کہ رسول اعظم کی عیدمیلادالنبی کے جلوس ہوں یا ان کے نواسے حضرت امام حسین علیہ السلام کے جلوسوں کے لیے لائسنس کی ضرورت ہے ،جبکہ باقی ہر طرح کے برے کاموں کو بغیر اجازت کیا جا سکتا ہے۔ ان کا کہنا تھا کہ اللہ اور اس کے رسول کی مانو گے تو دنیا میں عزت میں اضافہ ہوگا ورنہ ذلت و خواری ان کی ہے۔
وفاق المدارس الشیعہ کے صدر نے افسوس کا اظہار کرتے ہوئے کہا کہ اتحاد تنظیمات مدارس کے ایک ذمہ دار مولانا نے اہل تشیع کی کتب کو غیر معتبر کہا ہے۔ ہم ان سے گزارش کرتے ہیں کہ آپ کی کتب صحاح ستہ کو دیکھ کر ایک ہندو نے بدنام زمانہ گستاخ کتاب رنگیلا رسول لکھی اور جن کتابوں سے ملعون سلمان رشدی نے اپنی بے ہودہ کتاب شیطانی آیات لکھی وہ تمام حوالاجات بھی انہیں کتابوں سے لئے گئے تھے۔ لیکن پھر بھی میں کہوں گا کہ مولانا یہ رویہ صحیح نہیں، ناراض نہ ہونا، جن سے آپ دین لے رہے ہیں وہ سن 80 ہجری میں پیدا ہوئے اور جن سے ہم نے دین لیا وہ خانہ کعبہ میں پیدا ہوئے اور ہمیشہ رسول خدا کے ساتھ رہے۔
ان کا کہنا تھا کہ ہم جن شخصیات کو مانتے ہیں وہ معصوم ہیں۔ امام جعفر صادق علیہ السلام نے یونیورسٹی قائم کی جس میں مکتب حنفی کے امام ابو حنیفہ بھی پڑھتے رہے، وہ ہمارے چھٹے امام کے شاگرد ہیں۔
The post ربیع الاول خوشیوں کا مہینہ، پیغمبر اکرم رحمت اللعالمین بن کر آئے، علامہ حافظ ریاض نجفی appeared first on شیعہ نیوز پاکستان.
