شیعہ نیوز: حزب اللہ لبنان کے سربراہ شیخ نعیم قاسم نے زور دیکر کہا ہے کہ لبنان کی حکومت نے نام نہاد سمجھوتے کی خلاف ورزی پر مرکوز ہونے کے بجائے استقامتی محاذ کو نشانہ بنایا ہوا ہے۔
رپورٹ کے مطابق 33 روزہ جنگ میں صیہونی حکومت کو شکست دینے کی بیسویں سالگرہ کے موقع پر شیخ نعیم قاسم نے اپنے خطاب میں علاقے، لبنان اور استقامتی تنظیم حزب اللہ کے معاملات پر روشنی ڈالی۔
انہوں نے لبنان کی حکومت پر سخت تنقید کرتے ہوئے کہا کہ لبنان، امریکہ اور اسرائیل کے مابین نام نہاد سہ فریقی مذاکرات کے تحت سات اجلاس منعقد ہوئے ہیں لیکن اس دوران لبنان کی حکومت صرف امریکہ اور صیہونی حکومت کی پیروکار دکھائی دی ہے۔
شیخ نعیم قاسم نے زور دیکر کہا کہ مذکورہ مذاکرات میں لبنان کی حکومت نے صیہونی حکومت کو تمام جرائم سے بری اور ان جرائم کی عدالتی پیروی کا راستہ بھی بند کردیا۔
یہ بھی پڑھیں : سپاہیان اسلام نے دنیا کی مسلح ترین فوج کو شکست دے دی، جنرل احمد وحیدی
انہوں نے دو ٹوک الفاظ میں کہا کہ حزب اللہ ایسے کسی بھی مذاکرات کی نفی کرتا ہے جس میں اسرائیل کے مفادات کا تحفظ کیا جا رہا ہو۔
حزب اللہ کے سیکریٹری جنرل نے لبنان کی حکومت سے مطالبہ کیا کہ مذاکرات میں شکست کا اعتراف کرے اور اپنی عوام کی جانب لوٹ آئے تا کہ ایک متحد اور ٹھوس موقف اپنایا جاسکے۔
انہوں نے جوزف عون کی کابینہ سے قومی اتحاد، طاقت، اقتدار اعلی اور استقامت کی تمام صلاحیتوں سے استفادہ کرنے کی ہدایت دی اور اسے دشمنوں کے مقابلے کا واحد مؤثر طریقہ قرار دیا۔
شیخ نعیم قاسم نے یہ سوال اٹھایا کہ لبنان کی حکومت کس طرح سے لبنان کی فوج اور سرزمین پر صیہونیوں کے مسلسل حملوں کو برداشت کر رہی ہے؟
انہوں نے کہا کہ حزب اللہ لبنان امریکی سرپرستی کی مخالفت جاری رکھے گا۔
حزب اللہ لبنان کے سربراہ نے اس موقع پر (ایران اور امریکہ کے مابین ہونے والے) اسلام آباد سمجھوتے کا ذکر کرتے ہوئے کہا کہ ایران کی اس مفاہمت کے نتیجے میں صیہونی جارحیت کو لگام دی گئی اور تل ابیب اور امریکہ کو کشیدگی کم کرنے پر مجبور کیا گیا۔
انہوں نے زور دیکر کہا کہ اسلام آباد سمجھوتے کے نتیجے میں ہی لبنانی عوام اپنے گھربار کی طرف لوٹ سکے۔
شیخ نعیم قاسم نے واضح الفاظ میں کہا کہ استقامتی تنظیم حزب اللہ، دشمنوں کے حملوں کے مقابلے میں دفاع کا سلسلہ جاری رکھے گی۔
انہوں نے کہا کہ طاقت کا توازن ہمارے حق میں نہیں ہے لیکن ہم سرخم نہیں کریں گے۔
حزب اللہ کے سیکریٹری جنرل نے لبنان میں استحکام پر زور دیا اور بے گھر شہریوں کی مدد کو حکومت کی ذمہ داری قرار دیا۔
شیخ نعیم قاسم نے حزب اللہ کے مجاہدوں سے مخاطب ہوکر کہا کہ ہم خون کے آخری قطرے تک آپ سب کے شانہ بشانہ کھڑے رہیں گے اور ایک لمحے کے لیے بھی تمھیں اکیلا نہیں چھوڑیں گے۔
انہوں نے کہا کہ اس غم و غصے کو اپنے سینوں میں برقرار اور اہداف کے حصول کے لیے تیار رہیں۔
The post اسرائیل کے بجائے، لبنان کی حکومت نے حزب اللہ کو نشانہ بنایا ہوا ہے، دفاع کا سلسلہ جاری رکھیں گے، شیخ نعیم قاسم appeared first on شیعہ نیوز پاکستان.
